မြန်မာပန်းချီမှတ်စု (၃၂)
Art minute in Pnsodan
Aung Soe Min
Artst- Aung Khing
Medium- Acrylic on Canvas
Size- 30″×36″
Title- Duet Dance
Year Created- 2015
ဦအောင်ခိုင်ရဲ့ ပန်းချီဆရာ ဘဝဟာ ထူးခြားပါတယ်။ ငယ်စဥ်က ပန်းချီရေးတဲ့အခါ မော်ဒန်ဟန်ကိုရေးလို့ ပစ်ပါယ်ခံရပါတယ်။ ဆိုရှယ်လစ်ခေတ်မှာ တစ်ကိုယ်တော်ပြပွဲ ပြုလုပ်ဖို့ ကြိုးစားပေမဲ့ တစ်ပွဲလုံး အပါယ်ခံ အပိတ်ခံရတဲ့အပြင် ခေါ်ယူသတိပေးခြင်းပါခံရပါတယ်။ ပန်းချီကောင်စီ ဥက္ကဌဖြစ်တဲ့ ဦးမင်နိုင်က ပန်းချီပြပွဲကိုပိတ်ချင်ပိတ်ပါ လူကိုမပိတ်ပါနဲ့ နောင်ပြပွဲပြချင်တဲ့အခါ ထပ်ပြီးကြိုးစားခွင့်ပေးပါလို့ ပန်းချီဆရာချင်းစာနာပြီ မေတ္တာရပ်ခံခဲ့ရပါတယ်။ (၂၀၀၀)ခုနှစ်ကျော်တော့မှ သူရဲ့လက်ရာတွေကို ပြန်လည်ပြသခွင့်ရပါတယ်။ (၂၀၁၂) နောက်ပိုင်းတိုင်းပြည်ပွင့်လင်းလာတော့ ပန်းချီချစ်သူ၊ စုဆောင်းသူတွေက သူရဲ့လက်ရာတွေကို ကြိုဆိုခဲ့ကြပါတယ်။ အသက်အရွယ်ရရှိလာပြီ ဖြစ်ပေမဲ့ သူ့ရဲ့ရေးအားက ကြောက်စရာကောင်းလောက်အောင် အတိုးချ ပြီးရေးပါတယ်။ တကယ်တော့သူဟာ ရိုးရာသစ်ဟန်ရဲ့ ဆရာတစ်ဆူ ဖြစ်တဲ့ ပန်းချီအောင်စိုးရဲ့ ဟန်နဲ့ အတော်နီးစပ်ပါတယ်။ မြန်မာ့ရိုးရာလိုင်း မျဥ်းကြောင်းတွေကိုထူထူထဲထဲနဲ့ ရေးဆွဲပြီး ကနုတ်တွေ ခြူးပန်းတွေ မညီမညာ ခေတ်သစ်ဟန် အသက်သွင်းပြီး ပြန်လည်ပုံဖော်ပါတယ်။ သူ့ရဲ့ မိန်းမများ ပန်းချီကားတွေဟာ ဝတ်ရုံတွေ တွဲလောင်းကျနေသလို ပျော့ပျောင်းလှပါတယ်။ အရောင်တွေက စူးရဲတောက်ပနေပြီး သူချစ်တဲ့ မျဥ်းကြောင်းတွေကိုအထောက်အကူပြုယုံ ဖြည့်သွင်းထားပါတယ်။ သူ့ပန်းချီကားတွေကို နိုင်ငံတကာက ဝယ်ယူစုဆောင်းထားတဲ့အတွက် မဆုတ်မနစ်ကြိုးစားခဲ့တဲ့ ပန်းချီဆရာတစ်ယောက်ရဲ့ ဆုလဘ်လို့ပြောရမှာပါ။